2007-03-27

مناخوليا

Nostalgia:هي مصطلح يطلق علي الحنين
في البدايه حوالي القرن ال18كان يطلق علي الحنين الي الوطن واول مره يكتشفوه كان بين الجنود اللي علي الجبهه بعيد عن وطنهم مده طويله ، وبعد كده في منتصف القرن التاسع عشر بقي بيطلق علي الحنين الي الاماكن او الي الازمنه الماضيه او اي حنين من اي نوع لاي حاجه

الحنين ده الاطباء النفسيين بيعتبروه نوع من انواع الاكتئاب او السوداويه او زي المصطلح الطبي ما بيقول
melancholia.....
الكلمة اللي بننطقها بالعامية مناخوليا......وبيقولوا كمان انه ممكن لو الحاله زادت عند المريض تؤدي بيه الي الانتحار




معني كده اننا عندي مناخوليا في مراحلها المتقدمة ، ايوه باعترف واقر وانا بكامل قواي العقليه اني عندي مناخوليا ويخشي عليا من الانتحار في اي وقت


فانا دايما اشعر بحنين فظيع للماضي ....ليس ماضيّ انا ايام المدرسه والكليه بس ، لا انا دايما احن لايام زمان ....زمان اوي حتي قبل ما اتولد

كان نفسي دايما اني اكون جيت الدنيا في ايام الثلاثينات او العشرينات وحتي قبلهم كمان ايام حريم السلطان ، متعتي في الدنيا اني اقعد اتفرج علي فيلم تسجلي عن الازمنه اللي فاتت، خصوصا افلام الحرب العالميه الاولي او التانيه ، اي حاجه ابيض واسود حتي لو صوره ،مش عارفه ليه


يمكن علشان الناس ايام زمان كانت رايقه ومش شايله اي هموم علي قلبها من اللي احنا شايلينها دلوقتي ، يمكن علشان الدنيا ما كانتش معقده زي دلوقتي ، كانت سهله ومش مكلكعه دنيا مافيهاش الا لونين يا ابيض يا اسود والرمادي ده ناسها ماكانوش بيحبوه

الناس اياميها كانت راضيه وبالها رايق واقل حاجه تكفيها ، كانت اكبر متعهم في لمة العيله بعد العشاء يتسامروا حوالين لمبة الجاز ، الضحك كمان كان سهل والضحكه كانت تطلع من القلب علي اقل حاجه يمكن علشان مش مهمومين زينا

مافيش وراهم فواتير الكهربا والمياه والموبايل اللي تعلي الضغط وتجيب السكر ، الاسعار علي ايامهم كانت بالنكله والسحتوت دلوقتي الجنيه قرب ينقرض

ولا يمكن علشان الاحباطات اللي بنشفها كل يوم بالجمله ...من حادثة قطار الي غرق عباره الي حوادث طرق بالجمله الي حريق ضخم في بيوت الناس الغلابه ، الي اكتشاف مجازر للاسري

ولا يمكن علشان ماكنتش فيه هناك تعديلات دستوريه ولا استفتاءات ولا تزوير انتخابات علي عينك يا تاجر كده....؟؟؟؟؟

ولا يمكن علشان اللي اختشوا ماكانوش لسه ماتوا ....؟؟؟

بس اكيد اكيد علشان الناس كانت حاسه ان البلد لسه بتاعها ولسه ماباعوهاش لحد

كل يوم باحلم انا الاقي آلة الزمن زي اللي كانت في فيلم back to the future
واركبها واروح الماضي اعيش هناك وماجيش هنا تاني ابدا، اكيد هاكون في قمة السعاده،
وها خف من المناخوليا اللي عندي


31 comments:

ma_3alina يقول...

أنا بقى غلبتك .. لأن منخوليتي اخترقت حاجز الزمان والمكان ..
نفسي أرجع للقرن السبعتاشر أو التمنتاشر كده وكمان في انجلترا بالذات .. لما كان الرجالة بيلبسوا البدل الخنيقة دي والستات كلهن هوانم .. وكان فيه ذوق في التعامل .. الراجل لو لقى ست يرفع لها الطاقية .. والست لما تقابل راجل تنحني نص انحناءة أمامه .. الأفلام بتاعة الفترة دي أفلامي المفضلة أيا كانت قصة الفيلم ... هيييييييييييه منخوليا ..

يا مراكبي يقول...

دي معلومة جديدة نشكرك عليها يا دكتورة .. وموضوع الحنين للماضي أنا مش شايفه حنين للماضي بقدر ما هو حنين للبساطة والهدوء والروقاااان

بالنسبة لقصة حلم اللي في البوست اللي فات .. الموضوع ده بيحصل في حاجات تانية كتير غير موضوع الجواز .. والإرتياطات والتكتيف اللي نتج عن التجربة اللي حصلت بيخلي الواحد يتخنق لكن ما باليد حيلة .. والواحد بيتمنى إنه ربنا يعوضه خير في الآخرة إن شاء الله

تحياتي

copa يقول...

مناخوليا والله اسم حلو بس انا منخوليتي في طبيعتي الظلام و الهدؤ والليل و ايام العصور القديمه خالص ايام السيوف عششقي وعلي فكره انا بعتذر اني معلقتش بس كان وقتها كان الجهاز منيل خالص و النيت مشر راضي يتحرك فقلت اعمل تصبيره كدا و بعد كداابقي اجي تاني

خمسة فضفضة يقول...

السلام عليكم
ماعلينا
اهو كل واحد ومناخوليته بقي انت نفسك ترجع انجلترا ، بس انا نفسي ارجع لمصر مصر اللي بحق وحقيق مش المزيفه بتاع اليومين دول اللي كل حته فيها اتباعت واتغيرت واللي كل حاجه فيها بقت زي الورد الصناعي شكل بس ما فيش ريحه ولا روح

اه علي فكره ما تنساش تبقي تحط الباروكه التحفه اللي كانوا بيحطوهاهناك في العصور الوسطي

خمسة فضفضة يقول...

السلام عليكم
يا مراكبي
العفو حضرتك ، فعلا الواحد عاوز يهرب من الهموم اللي محوطاه من كل حته ، ويرجع تاني لايام راحة البال

بالنسبة لحلم دي حاجه بسيطه مش هانيجي حاجه جنب حضرتك ،زي ما حضرتك بتقول الاحباطات مش في الجواز وبس دي حوالينا في كل حاجه و باذان الله ربنا يعوضنا كلنا في الآخره عن اللي شايفينه وعايشينه

شكرا علي مرور حضرتك ، نورتني

خمسة فضفضة يقول...

السلام عليكم
كوبا
لا ولا اسف ولا حاجه فعلا الجهاز امبارح كان حاجه صعبه اوي والنت كانت بطيئه لدرجة اني شكيت ان الموضوع ده يكون مقصود

عموما شكرا علي زوقك ومرسي علي التعليق

mohandat يقول...

السلام عليكم ورحمة الله وبركاته
ههههههههههههههههههههههههههههههههههههههههههههههههههههه
اعذريني كنت فعلا عايز اضحك اصلي كنت فاهم منخوليا ديه حاجه كده زي التربنه والجنان علي اصلو بس الحمد لله طلعت بسيطه وعندنا كلنا
-----------
النقطه المهمه في الموضوع انك مركزه علي السياسه في الجانب السئ في مجتمعنا ده وكأن الناس زمان كانو عايشين قمة الديمقراطيه انا مش بقول اننا كويسين ولا تحسن من غيرنا بس في كل عصر بيحصل بلاوي ومش يمكن ترجعي للحرب العالميه تلاقي نفسك في مدينه هيروشيما ولا نجازاكي ولا العصور الوسطي تلاقي نفسك متهمه بالسحر ويقيمو عليكي الحد اللي انا مش فاهم ازاي اخترعوه او ترجعي لعصر الفراعنه تلاقي نفسك تبع الهكسوس واحمس جاي يخطفك علي حصانو بس علشان يقتلك انا مش بعقدك بس صدقيني لو كنتي هتعيشي في العصور ديه باحسن من حالنا ده كان زمانك ايامهم مش ايامنا
--------------------
بالنسبه للاسعار والسحتوت والنكله طيب ما الرجوع لايام المقايضه افضل كانت بسيطه تاخدي تفاحه قصاد موزه او كيلو قمح قصاد اتنين كيلو ذره وهكذا
----------------------
موضوع الصيادله انا متاكد انو هيعجبك بس انا هحطو البوست اللي بعد القادم اصلي لسه بمخمخلو :p



مهند المصري
الباحث عن الحقيقة

خمسة فضفضة يقول...

السلام عليكمورحمة الله وبركاته

عارفه والله يا استاذ مهند ان كل عصر وله سيئاته بس عارف زمان اوي كانت المصايب بتحصل في الدرا ماكنش حد بيدرا بيها فكانت الناس مش مهمومه انما دلوقتي كل حاجه في لحظتها بتتعرف وما فيش حاجه بتستخبي وده اللي بيخلي المناخوليا تزيد اوي اوي لما يبقي الواحد شايف وعارف ومش قادر يعمل الا اضعف الايمان ( يغير بقلبه ويكشف راسه ويدعي ربنا )
علشان كده دلوقتي تلاقي امراض القلب والضغط والمراره منتشره من كتر الكبت
ما احنا الجيل اللي شاف الحرب علي الهواء مباشرة ولا ماتشات الكوره

اما الاسعار ، ايه رايك بقي نرجع لابعد من كده شويه ، ان ما يكونش حاجه بتاعت حد اي واحد عاوز حاجه ينزل علي الغابه طوالي ويجيب اللي هوه عاوزه اشي تفاح وايشي موز وممكن يصطاد له فرختين تلاته وبطتين ومن غير فلوس
---------------
هو انت لسه مصمم علي البوست اياه ده ، خلاص براحتك انا في الانتظار......ههههه

الراقص مع الذئاب يقول...

اما انا بقي فمش بحب الماضي خالص وعلي عاوز ارجعله ابدااااااااا
معقولة ارجع لزمان واروح الكلية بشرط وطربوش
واربي شنبي وانا شاب عندي 30 سنة
ولما اشوف واحد اقوله نهارك سعيد وسعيدة مبارك
واقل لماما يا نينة
لالالالالالا
غلس اوي الماضي دا....كان زمان محدش بيدخل المسجد يصلي غير الناس العواجيز اللي مستنيين الموت
دلوقتي بقت الخناقات علي الصف الاول والاذان قبل الصلاة بنص ساعة...ولله الحمد...
كانت البنت الحشمة بتلبس نص هدوم البنت المتبرجة الناهرده

لا يا ستي النهادره احلي بكيتر من امبارح

وبكره إن شاء الله احلي وبعده احلي واحلي
وربنا يخلي الواد لأبوه
ومصر تتملي بالزرية (المباركة)...والدستور يتلغي خالص....والناس تدخل المعتقلات من غير واسطة

شفتي بقي الحمد لله انا مطلعتش منخوليا

بعد إذنك بقي عشان رايح هركب التربيزة واطير اروح انظف كوكب زحل من التراب اللي عليه...وارش شوية مية علي كوكب عطارد عشان يبرد شوية...واخرج كوكب بلوتو من التلاجة عشان يفك قبل ما امي تطبخه علي الملخية بكره

mohandat يقول...

السلام عليكم ورحمة الله
طيب خلاص عيشي العصر الحجري
بس اوعي ترجعي للعصر ده تلاقي دنياصور اكل لحوم البشر وراكي
ههههههههههههههههههههههههههههههههههه
فكرتيني بحته فيلم كده لاكل البندق تعرفيه ؟
الفيلم بيجيب اكل البندق كل شويه يروح عصر وكل ما يروح عصر يتبهدل فيه ويطلع عينو بس الحمد لله في الاخر اغمي عليه

----------------------
انا عارف ان البوست هيعجبك وكمان بما اني شوقتك ليه يبقي هيعجبك اكتر
بالنسبه للراقص
انا مربي شنبي وانا في القرن الواحد والعشرين
هو الشنب عيب؟
الباحث عن الحقيقة
مهند المصري

خمسة فضفضة يقول...

السلام عليكم ورحمة الله وبركاته

تصدق انا هابدأ اغير رايي ، بما ان دخول المعتقلات بقي من غير وسايط لازم الواحد يفكر كمان مره ، اكيد هنا ها يبقي احلي بكتيييييييير

ما تنساش تبقي تاخد كوكوب اورانوس وشين بويه علي الماشي

ههههههههههه

خمسة فضفضة يقول...

وعليكم السلام ورحمة الله وبركاته يا استاذ مهند
ايه النظره التشائميه دي
هو انا كل ما اروح حته ها تطلعلي فيها القطط الفطسانه ....خلاص شفلي انت بقي حته الاقي فيها مأوي وما يكونش فيها ديناصورات ولا هكسوس ولا احمس ولا قنابل ذريه ولا عنقودية ولا معتقلات ولا تهمه زور بالسحر ولا حروب علي شرط يكون جوها حار جاف صيفا دفئ ممطر شتاءا علي كافة الانحاء
ويبقي الف شكر ليك
--------

ان شاء الله البوست يعجبني ومازلت في الانتظار

mohandat يقول...

السلام عليكم
انا مش زعلان يا جدعان
انا بس قولتها من باب ان الروشنه والاستيل والشباب اللي في العشرين لازم يكونو من غير شنب
وانا مربيه روشنه برضو مع الدوجلاس
اهو اي حركات في الاسطنبات


مهند المصري
الباحث عن الحقيقه

elkamhawi يقول...

هههههههههههه
لو لقيتى الة الزمن ابقى هتهالى والنبى معاكى انا عايز ارجع ايام الكفار
خمر ونساء ووقد بنات

khaled يقول...

ربنا يعافينا من المناخوليا اللى ملت البلد
:)

خمسة فضفضة يقول...

السلام عليكم ورحمة الله وبركاته

منور يا استاذ قمحاوي
ليه كده بس ، حد عاوز يرجع تاني للايام السوده دي ،المفروض اننا نحمد ربنا انه انعم علينا بنعمة الاسلام والتوحيد
مش نتمني اننا نرجع تاني لعهود الكفر والضلال


شكرا علي مرورك

خمسة فضفضة يقول...

السلام عليكم ورحمةالله وبركاته

منور يا استاذ خالد

آمين يارب

شكرا علي المرور

ana ga3an يقول...

اوباااا
معلومة في الجون
يعني الحالة اللي انا فيها بقالي 7 سنين ليها تفسير علمي
انا ساعات بحس بحنين شديد لكفتة التسعينات من عند الرفاعي
او طواجن الخضار المنقرضة منذ حكم السادات

اعتقد دي اسمها متلازمة طواجنوليا

خمسة فضفضة يقول...

السلام عليكم ورحمة الله وبركاته

اهلا وسهلا يا استاذ اسلام
بجد بجد والله منورني

انا قريت المدونه بتاعتك كلها علي مره واحده بجد جميله اوي ماقدرتش اتحرك قبل ما اخلصها

الحاله اللي عند حضرتك علاجها طاجن قبل الاكل وبعده ثلاث مرات يوميا لمدة شهر وان شاء الله تلاقي تحسن ...ههههه

خمسة فضفضة يقول...

هي المناخوليا في حد ذاتها معناها الاكتئاب والسوداويه
وبيندرج تحتها الNostalgiaاو الحنين

بس خلاص
ده مجرد توضيح لا حد يكون وصلته المعلومه بشكل تاني

shreef يقول...

مناخوليا..و الله مش بطال على كده في ناس كتير في الضياع بس اتمنى انها متوصلش للانتحار..و بعد لما متلاقي الة الزمن ابعتيهالي لاني مش هرجع للماضي انا عايز اطلع المستقبل علشان اشوف العالم ده رايح على فين..يا ترى هلاقي كل الحاجات اللي انتي زكرتيها ديه ولا ساعتها هيكون عالم افضل؟؟ اتمنى..سلام

خمسة فضفضة يقول...

السلام عليكم ورحمة الله وبركاته

أ. شريف
خلاص اتفقنا اول ما الاقي آلة الزمن هابعتها لك علي طول

بس يارب المستقبل يطلع احلي واحلي لان ده اكيد اللي مصبرنا ومخلينا مستحملين علي امل ان بكره يبقي احلي

Just Me يقول...

حلو اوى
تحيا المناخوليا !!

خمسة فضفضة يقول...

السلام عليكم ورحمةالله وبركاته

Just Me
اهلا بيكي اسعدني مرورك
نورتيني

Ma-3lina يقول...

انت منهم برده اللى عايزين راحة البال و ايقاع الحياة البطىء اياه

انا معاكى ان زمان احسن بس برده هتفتقدى التقدم العلمى الرهيب و الاختراعات الجديدة و لا ايه ؟؟؟؟؟

خمسة فضفضة يقول...

السلام عليكم ورحمة الله وبركاته

اهلا بيك يا د/ مرام

مش عارفه بيتملكني شعور رهيب ان برضو هابقي اسعد ، وان مع اختفاء كل هذا التقدم التكنولوجي هابقي اسعد مليون مره

وهايبقي البال رايق وفاضي ومافيش اي هموم ، مثلا مش هاحمل حم ان الكهرباء ولا الميه تقطع ، ولا شحن الموبايل يخلص ، ولا النت تفصل ...وكلام من ده يعني


اهلا بيكي يارب دايما منوراني علي طول

ياسمين حميد يقول...

صحيح مش حتحملي هم كهربا وانترنت، بس حتحملي هم حطب وزيت وشمع يخلصوا.
وعشان حكاية النكلة و السحتوت، ماهو معظم الناس أيامها ماكانتش لاقية النكلة والسحتوت دول وكانوا بيباتوا جعانين.
وراحة البال كانت موجودة صحيح أكثر، بس حتى أياميها ماكانتش عند كل الناس. راحة البال والقناعة موجودين في كل زمان عشان هما جوا الإنسان مش براه. وكل زمان ماضي أو حاضر له عيوبه وحسناته.
وتحياتي

Sahar يقول...

أنا إستمتعت بمتابعة موضوعات المدونة لأنها جذابة وتلقائية و دمها خفيف وده كمان ينطبق على روح التعليقات وأحب أن أشارك بمعلومة بصفتى طبيبة نفسية وهى أن ال nostalgia (الحنين الى الأماكن أو الأزمنة الماضية)لايعتبر فى نظر الأطباء النفسيين إكتئابا ولا رابطة بين هذا الحنين وبين الإنتحار فى نظر الأطباء النفسيين .أما عن ال melancholia فده مصطلح يستخدم للإشارة الى نوع من أنواع الإكتئاب المرضى. تمنياتى بالمزيد من التوفيق

eskandrania يقول...

you are not manakholia wa la 7aga because there are lots of people who are just like you and I am one of them. My mind rejects the present and is trapped into the past. not because my mind is crazy but simply because my past was so beautiful and my present is just ugly, dark , and empty except from continuous worrying and sadness. I was touched by every word you wrote. I felt if somebody was writing on behalf of me expressing my feelings. Unfortunately, past will never come back and so our dream to live just one day or even one moment of the past will never come true and this make me sad. at the end I would like thank you for your article

signature,
3asheka le masr ta2en min el ghorba

hmabboud يقول...

I agree with eskinderia.. Eskenderia didn't leave me anything to write. I loved your article indeed. Please don't hesitate to write me anytime. Would love to talk to you.

Tc

hmabboud يقول...

BEAUTIFUL, Eskenderia didn't leave me anything to say. Took everything off my mind indeed. I loved your article and would live to talk to you..Please don't hesitate to contact me

القرآن الكريم