TvQuran

٢٠٠٧-٠٣-١٧

يا قاعدين يكفيكوا شر الجايين

اكيد سمعت المثل ده كتير قبل كده .........
بس بجد يعني دي كانت اول مره احس معناه بالشكل الجامد اويي ده

من كام يوم ده عليا في الصيدلية واحد من اللي شكلهم يدل علي انه بيشتغل في حاجه تبع الدوله ، مهمتها العكننه علي الناس ...؟؟؟

راجل اسمر طويل يلبس نظاره كعب كوبايه ويحمل في يده دوسيه ملئ بالاوراق المبعثره وفي اليد الاخري حقيبة جلديه تحتوي ايضا علي اوراق كثيره جدا

هو : السلام عليكم
انا : وعليكم السلام ورحمة الله وبركاته
هو : حضرتك المسؤله عن الصيدلية
انا : ايوه

هو: كنا عاوزين من حضرتك تمليلنا الورقه دي وتبقي تتفضلي في مجلس المدينه لما يجيلك اخطار عشان تسددي قيمة العوايد وضرايب الاعلانات
انا : اعلانات .......!!!!!!!!!!!!!!!اعلانات اييييييييييييييييه ؟؟؟؟؟
هو : مش حضرتك معلقه يفط للصيدليه وكمان طبعتي اكياس وفواتير عليها الاسم والعنوان بتاعها ؟؟؟؟
انا : ايوه طبعا وهي دي فيها ايه يعني ....هو انا كده ابقي عملت اعلان ولازم ادفع عليه فلوس
هو : حضرتك فيه كمان يافطه مضيئه قدام باب الصيدليه ..دي برضو عليها ضريبة اعلان
انا :.....................( بصاله باستغراب وفاتحه بقي)...طب ايه العوايد دي كمان
وبتخدوها علي ايه
هو : دي فلوس علي نظافة الشارع وانارته وكده يعني
انا: آل يعني الشارع نضيف زي الفل وبيتكنس ويترش كل يوم واللمض اللي فيه 10000وات وكلها سليمه
هو : لو سمحتي ما تعطلنيش ..اتفضلي املي البيانات اللي في الورقه دي وان شاء الله ها يجيلك اخطار بقيمة العوايد المفروض تدفعيه
انا : طبعا اخذت الورقه ومليتها من سكات ولسان حالي بيقول ...حسبنا الله ونعم الوكيل
ناقص يدفعونا ضرايب علي الهواء اللي بنتنفسه

وحسيت اني لو رحت هناك ها يحصلي زي اخينا ده


The image “http://www4.0zz0.com/2007/03/17/00/79818465.jpg” cannot be displayed, because it contains errors.



6 comments:

FATMA يقول...

ايوه هيحصلك كده فمتروحيش احسن

ma 3lina يقول...

ما هو في بلدنا الطيبة حيحصل لك زي أخينا كده كده .. فحتروحي فين ؟؟

خمسة فضفضة يقول...

السلامه عليكم ورحمة الله وبركاته

توته توته ، وماعلينا، شكرا علي مروركم وتعليقاتكم

انتوا رايكم كده يعني ...ما روحش وعلي ضمانتكم ....؟؟؟

اقلكم مش حاروح واللي يحصل يحصل ...ههههه

mohand يقول...

هو الكومنت وصل ولا لا؟
لو موصلش ابقو بلغوني

mohand يقول...

دا موصلش :)
طيب انا كنت بقول ان ضحكت علي حكاية الشوارع النظيفة
وقولت كمان ان في كل محافظة في شارعين بس نظيفين
شارع المحافظ والشارع الرئيسي
السلام عليكم

خمسة فضفضة يقول...

ويارتهم كمان نضاف علي طول......دا ساعات وساعات
وقال يقولك عوايد ....ههههه

نورتني يا استاذ مهند

القرآن الكريم