TvQuran

٢٠٠٧-٠٣-١٨

ياتري احنا عايشين بوشين




امبارح وانا بقلب في القنوات لقيت فيلم كلم ماما لعبله كامل ، ما خدتش بالي من اسم القناة ، بس لقتني بفكر في حاجه غريبه اوي ، ليه في ناس عايشه بوشين مثلا عبله كامل دي ممثله ممتازه وليها ادوار كتير اوي في التليفيزيون هايله ، بس ما اعرفش بيبقي عقلها فين وهي بتختار ادوارها في السنيما ، وهل يا تري بتمثلها وهي منومه مغناطيسيا ، وهل لما بترجع تشوف اللي مثلته ده مش بتندم وبتكره نفسها ....؟؟؟؟
فضلت الحكايه دي شغلاني لفتره ، وبعد تفكير لقيت ان مش هي لوحدها اللي كده لا ده كل المجتمع تقريبا كده
اعرف واحد متدين وحافظ القرآن كله وما بيسيبش فرض والناس تقولك ...الا الاستاذ فلان ......بس تعالوا بقي نشوف استاذ فلان ده مع مراته وعياله في البيت .....حدث ولا حرج ضرب واهانات لزوجته وولاده طول الوقت طول الوقت
يا اخي دا سيد الخلق صلي الله عليه وسلم بيقول "خيركم خيركم لاهله"

ناس تانيين بنتهم بتنزل من البيت ما تعرفش اذا كانت لابسه هدوم خروج ولا ....من غير
وتلاقيهم مش راضيين عن لبسها وكمان يقعدوا ينتقدوا اللي بيلبسوا كده ...طب ما تمنعوها من اللبس ده
(اتأمرون الناس بالبر وتنسون انفسكم وانتم تتلون الكتاب افلا تعقلون ) صدق الله العظيم

ناس بتقول حاجه وتعمل حاجه تانيه ، ناس علي النت وفي الشات عايشه بشخصيه مختلفه 180 درجه عن شخصيتها الحقيقيه
وناس وسط اصحابها غير ما بيبقوا مع اهلهم......وغيرهم وغيرهم قايمة طووووويله
هل يا تري احنا شعب بوشين بنقول كلام وبنعمل غيره....؟؟؟؟؟؟
ممكن نكون كلنا مصابين بازدواجية الشخصيه.....وممكن نبقى بوشين علشان نرضى الى بتتعامل معاه ..؟

هل السبب في ازدواج شخصيتنا هو عدم اتضاح الرؤية لدينا او عدم وضوح الهدف او عدم وضوح الهوية أو باسلوب اخر بتظهر الازدواجية لما يكون الواحد مش عارف نفسه عايزة ايه
ام انه راجع الي ضعف الوازع الدينى بالاضافه الى سوء وقلة التعليم و انعدام التربية بسبب لهاث الابوين وراء توفير متطلبات الحياة اليومية

ولا كل الاسباب دي مع بعض
ولا ...ولا ...ولا......لحد دلوقتي ما توصلتش للسبب الاساسي
وما زال البحث جاري


10 comments:

Unknown يقول...

السلام عليكم

على فكرة انا اخدت جولة فى مدونتك ولاقيتها حلوة اوى

ولاحظت كمان انها مش معروفة يعنى الزباين قليلين

وخسارة بجد ان البوستات التحفة دى محدش يقراها

المهم انا سعيدة اوى انى جيت هنا

سلام

البنت الشلبية يقول...

سلام عليكم,,,
ممكن يكون السبب الرئيسى فى ازدواجيتنا هيا اننا بنبقى عايزين حاجة والى مفروض علينا حاجة تانية ,,,يعنى مثلا مثلا الحجاب فرض فى الاسلام على المرأه لكن كتيييييير مسلمات مش محجبات لكن اسلامهم كويس يعنى مبيعملوش غلط ولا كبائر ,,ده لانهم عندهم ازدواجيتهم عايزين الدنيا والاخرة,,,يعنى يبقى شيك وروشين وعلى الموضة وبرده مبيعملوش كبائر ولا غلط عشان يدخلو الجنة,,,للاسف حب الدنيا والاخرة لا يتفقان,, وكمان العادات والتقاليد الى عشنا عليها سنين ليها مردود جامد على شخصياتنا,,,بنبقى عايزين نعمل كده لكن العادات والتقاليد رافضة او تمنع ,,وساعات بنرفض العاادات وبنعمل الى احنا عايزينه برده لكن ساعتها كل شئ بيتلخبط وكمان الناس بتشاور علينا ,, دى حاجة موجودة من زمان م جديدة ,,بوست رائع سلام

خمسة فضفضة يقول...

وعليكم السلام ورحمة الله وبركاته

انسانة :
مرسي اوي علي زوقك
انت نورتيني
وما تقلقيش ان شاء الله تتعرف مع الوقت

ma 3lina يقول...

والله ما اقدرش اقول لك إني بوشين ...وما اقدرش اقول إني بوش واحد ..
بس اقدر أقول لك إن التصرفات الي بتلاقيها في الناس اللي زي حالاتي وتفسريها إنها ازدواجية .. هي في الحقيقة الصراع اللي جوانا بين الخير والشر أو زي ما قالت شلبية بين الدنيا اللي بنحبها والاخرة اللي عايزنها ... بين الظروف اللي حوالينا وقناعتنا الشخصية ..
الصراع ده لما الخير اللي جوانا بينتصر بيخلينا نتصرف في مواقف بشكل تحسي إنه متناقض تماماً مع تصرفاتنا لما الشر اللي جوانا هو اللي ينتصر ..
ودا طبيعي في كل البشر فيما عدا الرسل .. اللي مش طبيعي إنك تلاقي واحد خير نقي .. أو شر كامل ..
مع تحيات سقراط سوفت .. على رأي واحد صاحبي

خمسة فضفضة يقول...

وعليكم السلام ورحمة الله وبركاته

عندك حق يا شلبيه هانم
بيبقي الانسان عين في الجنه وعين في النار وده اللي بيسبب ازدواجية تصرفاته
مثلا يبقي عاوز يكسب فلوس اكتر او يتمتع بحياته وشايف ان باسلوبه ده ها يتمتع اكتر
او خايف من كلام الناس
بس في رايي ان الواحد يعمل الصح اللي يرضي ربنا ويرضي ضميره وما يهمومش من كلام الناس

شكرا لك ونورتيني

خمسة فضفضة يقول...

نورتني يا ماعلينا باشا
بس شوف حضرتك اكيد الواحد لازم يكون هو ترمومتر نفسه ويتحكم في صراع الخير والشر اللي جواه
مش يسيب الحكايه كده للظروف

mohand يقول...

انا بس عايز اعلق علي الوشين في النت نظرا لان دا المكان الوحيد اللي احنا فيه حاليا وجهه نظري ان الانسان بيعيش اساسا بشخصيتين شخصيه قائمه بالفعل مرتبطه بعوامل كتيره من بيئه ومجتمع ودين وتعليم وغيرو وشخصيه تانيه هو بيتمناها لنفسو يعني مثلا تلاقي واحد مثلو الاعلي عمرو دياب علي اساس انو نفسو يبقي روش وطحن وواحد تاني يبقي شخصيه دينيه قوي مش هذكر فرد معين علشان مساويش كبار الصحابة والانبياء بعمرو دياب والعياذ بالله بس المقصود من كلامي اننا نفسنا نبقي كده مثلا بس مش قادرين لاننا بنتبع نظام عايشينو من ماديات وروحنيات وحجات كتيره قوي
انا سعيد بدخول مدونتك اطلاعي علي موضوعاتك واشكر ما علينا اللي وصلنا لهنا وأأسف للاطاله
الباحث عن الحقيقة
مهند المصري

خمسة فضفضة يقول...

السلام عليكم ورحمة الله وبركاته

اهلا بحضرتك يا مهند
انا مع حضرتك ان في ناس لما تحب حد بتبدأ تدريجيا من غير ما تحس تتقمص شخصيته
بس مش معني كده ان زي ما بيحصل وبنشوف علي النت وفي الشات الواحد من دول يكذب الكذبه وبعدين يصدقها

شكرا لمرورك ومنور المدونة

الراقـــص مع الذئـــــاب يقول...

دا شئ طبيعي
ان الواحد يتلون زي الحرباية
وهؤلا سماهم الصادق المصدوق صلي الله عليه وسلم إمعة
وأظن ان عبلة كامل لا يعتب عليها انها تبقي كدا او كدا

المشكلة في بقيت الناس
الناس ليه مش بتحب تقول الحق الا علي الضعيف
ليه احنا بلدنا وشعبنا كدا
لازم تبقي منافق وبوشين عشان توصل

عارفة لو واحد اتكلم بحق هيتقال عليه ايه؟؟
هيتقال عليه معقد نفسيا
ولا حول ولا قوة الا بالله

موضوع يستحق المناقشة وإعادة الحوار
جزاكي الله خيرا

خمسة فضفضة يقول...

وعليكم السلام ورحمة الله وبركاته

لقد ظلمت الحرباء بتشبيهها بهؤلاء ، فهي تتلون من اجل الاختباء فقط من اعدائها ، اما هؤلاء فلا اجد لهم العذر ولا اعرف لماذا يفعلون ذلك هل من اجل خداع الآخرين للحصول علي بعض المتع او المصالح الخاصه .....لماذا لا نكون جميعنا بوجه واحد هذا الوجه الذي نحب ان يرانا به الله تعالي يوم القيامه ......لا اعرف

من يفعل ذلك يسمونه بالعبيط
او كما تفضلت بالقول المعقد النفسي الذي دائما مع يسمع كلام من نوعية ياعم مشي حالك هي الدنيا كده شيلني وشيلك ،
ماتحبكهاش ، عرضها ما تكشكشهاش ...وغيرها من الكلمات التي تطلب منه النفاق والمداهنه حتي يصل الي مايريد

شكرا علي مرورك وتعليقك

القرآن الكريم