احمد ومني ( الجزء الثاني )

الجزء الاول

لم تستطيع مني ان تسمع حرف واحد من كلام د/ سليمان ،فبالها مشغول بفكره واحده

اكيد هاشيل الفارما ، هانجح ازاي ياربي ودرجة العملي هاتضيع....استر يارب دا انا علي طول من الاوائل ، هاجي علي آخر سنة واشيل مواد

وانتظرت انتهاء المحاضره بفارغ الصبر ، لتبدأ رحلة البحث عن المذكرة الضائعه

السلام عليكم ، عم فوزي ماشفتش مذكرة عملي بتاع سنة رابعه
مذكرة عملي .....سنة رابعه ......!!!!!!...مش فاكر.....ممممم.....لا مالاقيتش ، بس لولاقيتها اكيد هابقي اقولك يا دكتوره
دبريني يا سالي اعمل ايه ، هادخل الامتحان ازاي دلوقتي ، كان لازم يعني تسربعيني ، منك لله يا د/ سليمان
ما تخافيش يا مني ان شاء الله هانلاقيها ، ولو ماحصلش احنا نروح لدكتور احمد ونشرحله اللي حصل دا ذوق جدا واكيد هايحلهلنا
مر ثلاثة ايام ، ومني تبحث عن المذكره الضائعه ، سألت جميع طلبة السكشن علي امل ان تجدها ولكن بدون فائده ، حتي فقدت الامل في العثور عليها ،لم يعد امامها سوي شخص واحد .....د/ احمد

ترددت كثيرا ،فهي غير متأكدة من جدوي اللجوء اليه ، كما انها تشعر بحرج بالغ ، كيف ستقف امامه وجها لوجه لتشرح له ما حدث وتطلب منه العون

بصي يا مني مافيش قدمنا دلوقت غير د/ احمد
لا ماقدرش اروح اكلمه في موضوع زي ده ، دا انا اموت من الكسوف
ياحبيبتي ماتخافيش دا جنتي وذوق واكيد هايساعدك ويحللك الموضوع
انت شايفه كده يا سالي
اكيد
طيب بس تيجي معايا وانت اللي تتكلمي ، حسه اني هاتلبخ ومش هاعرف اقول ولا كلمه

كانت مقابلة د/ احمد اكثر من رائعه فلقد طمئن مني ووعدها ان يجد لها حلا ، و ان يوصي عم فوزي باعادة البحث
خرجت مني من عنده وقد زاد ذلك الشعور الغريب في نفسها تجاهه، واحست به يتحول من الشعور بالاعجاب والاحترام الي طريق آخر .....خافت بشده من نهايته ولكنها كانت سعيده ، شعرت بحاله من التوازن النفسي ، وذهبت عنها حالة التوتر والقلق التي اصابتها ، ونسيت تماما الافكار السلبيه والوساوس حول رسوبها بسبب ضياع المذكره ، وشعرت أن الأقدار تخبئ لها هدية عظيمة

مني ....مني لوسمحتي ...كان هذا مصطفي زميل مني في نفس الدفعه ونفس السكشن
ايوه اي خدمه يا مصطفي
د/ احمد باعت لك المذكره دي بيقولك ان عم فوزي لقاها امبارح وهو بينضف تحت البينش
يااااااااااااااااااه متشكره اوي يا مصطفي ، بس ايه اللي خلاه يديهالك
لا ابدا انا كنت عنده بسأله علي شوية حاجات في العملي ، وهو عارف اني معاكي في نفس المجموعه فطلب مِني اوصلهالك
اه منك يا مصطفي دايما كده مستفرد بالمعدين ونازل فيهم اسأله ، هو انت بتطلع الاول من شويه ...سوسه ...ههههههه
..........................
وجه مصطفي يتحول فجأه الي قوس قزح ويضطرب ولا يستطيع ان يجيب عليها الا بابتسامه باهته
اوك مرسي اوي يا مصطفي ...باي
لم تستطيع مني ان تخفي ذلك الشعور بالسعاده البالغه الذي ملأ وجدانها ، واخذت تحدث نفسها ان د/ احمد لم يهدأ له بال حتي اعاد لها ضالتها ، اكيد يفكر فيها كما تفكر فيه ،

و اخيرا وجدت تفسير للشعور الغريب الذي يراودها كلما راته او سمعت اسمه ....انه ذلك الشعور الذي يهتز له كيانها كله ....انه الحب
اخذت المذكره بين يديها واحتضنتها بشده
ظلت طوال اليوم تحاول ان تستذكر اي شئ ، فقط تقلب اوراق مذكرة الفارما بشوق ولا تري فيها الا وجهه، لتجد بين اوراقها ورقه حمراء غريبه رائحتها رائعه و مطويه علي شكل قلب ،


ايه الورقه الغريبه دي ، جت منين ؟؟؟؟؟ انا اول مره اشوفها انهارده ...ياتري مين اللي حطها ؟؟؟

تملكها شعور بالاستغراب ممزوج بالفضول واللهفة لمعرفة محتوي هذه الورقه العجيبة ، فتحتها بسرعه واخذت تقرأ محتواها وتعلو وجهها ابتسامة فرح