TvQuran

٢٠٠٨-١٠-٢٣

ثورة الطعمية



ارفعوا ايديكم عن اكلاتنا

بقالي 3 ايام كل ما افتح قناة فتافيت ( ايوه القناه المتخصصه في الطبخ ) الاقي الاعلان ده وبيتعاد في اليوم ولا ميت مره في فقرات البرومو اللي بين وفي وسط البرامج

بيجيبوا اكله معينه من الاكلات العربية مثلا الطعميه والتبوله والحمص والبقلاوه ....الخ ، وفي الخلفيه اغنيه ممكن تكون ليها علاقه بالاكله

وبعد كده يجيبوا الجمله دي

" ارفعوا اياديكم عن اكلاتنا "

وبعدين


" الم يكفيهم الاستيلاء علي ارضنا ، هاهم الآن يحاولون الاستيلاء علي حضارتنا واطباقنا "
فادي عبود
رئيس جمعية الصناعيين اللبنانيين

حملة فتافيت لمساندة الصناعيين اللبنانيين


وبس خلاص من غير اي اشاره لاي تفاصيل تانيه


بصراحه يا جماعه انا قلقت جدا ، ياتري ايه اللي حصل ، مين اللي عاوز يسرق اكلاتنا و خصوصا ان ساندويتش الطعميه بقي بجنيه وفيه الطمع ،
يمكن واحد جعان وعاوز ساندويتش ولا حتة بقلاوه ، وبجد شكلهم في الاعلان يجننوا ويجروا الريق ويحرضوا علي السرقه :))

المهم قلت ادور في موقع فتافيت يمكن الاقي حاجه مفيده مالاقيتش الا الصوره اللي فوق دي ، اروح يمين شمال مافيش حاجه

اسكت ....؟؟؟؟؟؟ ، لا طبعا رحت موقع جمعية الصناعيين اللبنانيين وبرضو مافيش اي خبر
قلت آخد لفه علي النت يمكن اعرف ايه الحكاية ، لقيت ايه ...خير اللهم اجعله خير

بيقولوا ان اليهود بعد ما سرقوا كل حاجه عندنا ونسبوها لنفسهم من اول الارض والمقدسات والهرم ولحد الخمسه وخميسه ..واحنا ساكتين

وبعد ماقالوا ان المسجد الاقصي مبني فوق معبد سليمان ولازما وحتما ينهد عشان يبنوا المعبد وشغاليين حفر تحت المسجد ....واحنا ساكتين

وبعد ما نسبوا كل حضارة الفراعنه ليهم ..واحنا ساكتين

وبعد ما سمموالنا الالكل والشرب وملوا اللبد بالمبيدات المسرطنه ( منه لله يوسف والي ) ....واحنا ساكتين

وبعد ما دخلوا ودنسوا الاقصي الشريف من كام يوم ، ومنعوا المصليين من الدخول ..... واحنا ساكتين

وبعد كل القتل والترويع اللي بيعملوه في الفلسطينيين كل يوم ...واحنا ساكتين

وبعد ما كل شويه يضربوا جنوب لبنان ، ويهددوا سوريا .....واحنا ساكتين

بعد ما سرقوا الارض والعرض ....واحنا ساكتين


ساكتين و مشغولين بمشاكلنا الداخليه والخلافات اللي بينا وبين بعضنا واللي كل مدي بتزيد( فتح وحماس ، حزب وطني واخوان ، سنة وشيعه يمين ويسار......الخ )
مشغولين بقضايا تافهه ومالهاش لازمة ( الحضري وعبد الواحد ،سوزان وهشام ، طلعت وجمال السادات ...الخ )


وبعد اما سرقوا كل حاجه و مالاقوش حاجه تانيه يسرقوها قرروا انهم يسرقوا الاكلات العربيه وينسبوها لنفسهم ويبقي ليهم فيها حق الملكية الفكريه وحقوق الطبع محفوظه وكده يعني

يعني عشان اعمل ساندويش طعميه لازم آخد منهم اذن والا ابقي باتعدي علي حقوقم الفكريه ، بالظبط بالظبط زي ما عملوا مع الاقصر ...... فاركين



المشكله هنا في ايه ، ان احنا ساكتين عن كل الحاجات دي ، واما جم يقربوا من الاكل اتكلمنا ، وقامت ثورة الطعميه المباركه بقياده قناة فتافيت الباسلة

صحيح عض قلبي ولا تعض رغيفي :)))



بالنسبه لي شايفه ان للحمله دي بعض الحق فقط اذا كانت بتعتبر ان اكلاتنا زي ارضنا و مافيش فرق بين واحد سرق شبر من الارض او ساندويتش طعمية
وان تراثنا وفلكلورولنا ولبسنا وارضنا جزء واحد لا يتجزء ومش من حق اي حد انه يسرق حاجه فيهم وينسبها لنفسه



اما غير كده فلا






18 comments:

بنت القمر يقول...

يا قلبك يا فضفضه....... كل اللفه دي عشان الطعميه!!!
علي فكرة الموضوع شكله تافه او متكرر لكن اذا الخمسه وخميسه سرقوها وقالوا عليها بتاعتهم
منستغربش سرقه الطعميه والينا باخر المستجدات بقي:))

فاروق عادل يقول...

نفس تعليق بنت القمر

))::وش واحد غتت

خمسة فضفضة يقول...

السلام عليكم ورحمة الله وبركاته

بنوتة القمر


ههههههه

ايوه طبعا يا ستي مش بقولك عض قلبي ولا تعض رغيفي

:)))))

خمسة فضفضة يقول...

السلام عليكم ورحمة الله وبركاته

طالب ثانوي
انت ايه اللي مقعدك قدام النت يابني ، يا بني قوم ذاكرلك كلمتين ينفعوك


وش واحد اغتت من الاولاني
ههههههههههه

عصفور المدينة يقول...

حسيت انهم مزودينها حبتين وخاصة أن كثيرا من مقدمي برامج الطهي في قناة فتافيت هم من اليهود
زي ريك ستاين ونيجيلا لاوسون
بس ما علينا

خمسة فضفضة يقول...

السلام عليكم ورحمة الله وبركاته

باشمهندس عصفور

ايوه عندك حق مزودينها اوي ، كان بقالي فتره من قبل رمضان منقطعه عن متابعتها ، ومن 3 ايام قلت اما شوف ايه اللي حاصل في الدنيا لقيت الاعلان ده وبيتكرر بشكل مستفز مع عدم اعطاء اي معلومات عن اي حاجه حت علي موقع النت


اذا كان الطهاه من اليهود او غيرهم فاده مايشكلش مشكله مع وصفات الاكل ، الكارثه في الموضوع ان فيه اكلات كتير جدا بيدخل في مكوناتهاالخمر، بس الترجمه مش بترجمها خمر لا يقولك خل العنب وخل الابيض وخل العنب الاحمر مع ان الكلام ( red wine ....etc )

بس القناه في المجمل واذا تغاضينا عن كده كويسه وبتقدم احيانا وصفات حلوه تنفع التنفيذ ، دا غير اصلا اني باتفرج عليهم مش عشان الوصفات لا عشان التكنيك والتركات اللي بتبقي موجوده في فن الطبخ ، يعني تحط ايه علي ايه وايه قبل ايه وايه احسن لايه .....الخ

معلش صدعت دماغك


سلام

Mafrousa يقول...

السلام عليكم و رحمة الله
تصدقى انا نسيت كنت حعلق إيه؟؟؟؟؟
من بعد ما كان الباب مقفول

ممممممممممم
طيب قوليلي الاول لغاية لما افتكر
انهو طعمية اللى بيقولوا بتاعتهم؟؟؟؟
الكبيره الكدورة ام ربع جنيه
ولا الصغيرة ام 10 قروش
ولا المبقلظة اللى فيها بيضاية مسلوقة
و لا الاسكندراني
ما هو لازمن نعرف
هههههههههههه

حاجة تفرس
تحياتي

مهندس مصري بيحب مصر يقول...

كلامك حضرتك الأخراني هو الخلاصة

بالنسبه لي شايفه ان للحمله دي بعض الحق فقط اذا كانت بتعتبر ان اكلاتنا زي ارضنا و مافيش فرق بين واحد سرق شبر من الارض او ساندويتش طعمية
وان تراثنا وفلكلورولنا ولبسنا وارضنا جزء واحد لا يتجزء ومش من حق اي حد انه يسرق حاجه فيهم وينسبها لنفسه
اما غير كده فلا

و انا متفق مع حضرتك تماماً رغم إني عمري ما شفت القناة دي

عين فى الجنة يقول...

اليابانيين سرقوا الملوخية وبيزرعوها عندهم
بس معندهمش الشهقة:))

مصــــري يقول...

دكتورة فضفضة

دائماً أبداً نجد صورة العربي علي شكل "كرش" وقد ظهر خلفه بقايا انسان في اي كاريكاتير.

لابد بالطبع ان نثور لأن الأمر يتعلق بالكرش العربي.

لا أدري ماذا أقول سوي بيت المتنبي.

يا أمة ضحكت من جهلها الأمم

أسامة

صبرني يارب يقول...

ايوه انا جيت الصبح فعلا ما عرفتش اعلق

بصي يا فضفضه

انا شايفه ان قناة فتافيت اتبنت الشعار او ايا كان المبدأ فيما يخصها


يعنى هى متخصصه فى الاكل بتتكلم عن حماية الاكل من السرقه

الدور والباقي بقى على الباقيين المسقعين

وتحياتي لك

يا مراكبي يقول...

أنا أول مرة أسمع عن القناة دي

لكن كله كوم والطعمية كوم تاني .. مش مهم نخسر أراضينا وكرامتنا لكن الطعمية لأ .. فيه حاجة إسمها أولويات يا جماعة

أنا مع الحملة دي .. وقريبا هأبدأ حملة عشان الكشري كمان

Unknown يقول...

طيب ايه اخبار عصير القصب لس بتاعنا ولا بقي تبع مين دلوقتي
انا خايفه يسرقوا الشعب بعد كده و الحكام العرب يصحوا يلاقوا البلاد فاضيه

تحياتي يا قمر

جلال كمال الجربانى يقول...

أرى أن الموضوع خاص بالمحافظه على التراث
ونحن نعلم أن أسرائيل دوله ليس لها تاريخ أوتراث
فهى تحاول أختلاق تراث على جميع المستويات
لأنها عندما تثبت أن الطعميه من أبتكاراتهم الغذائيه
والكل يعلم قدم الطعميه
بذلك يكون لديهم تاريخ وتراث غذائى خاص بالمنطقه منطقتنا
بذلك يتحقق لهم بالأختلاق تاريخ وتراث
يثبت وجودهم المختلق بمنطقتنا العربيه
أنهم يخططون على كل المستويات لأثبات علاقتهم بالمنطقه تاريخيا
هذه رؤيتى لموضوع الطعميه
مدونتك جميله ومعبره
وتقبلى تحياتى ومرورى

mohra يقول...

يعنى فتافيت مالهاش غير فى الفول و الطعميه..........و الله كتر خيرهم
الدور و الباقى على اللى نسيوا الارض
تحياتى

صاحب المضيفة يقول...

انا باحس ان القناة دي بتعيش في مود مختلف وبعيد عن الخلق خالص

ما علينا

هو اللي ناقص انهم يقتروا علينا الاكل كمان ولا همه مقترينه خلقة

ربنا يسترها علينا فعلا


تحياتي

الربان يقول...

تحياتي

سبحان الله...انا من محبي هذه القناة..و لكني لم الق بالا الي الاعلان....

طبعا نحن نيام في العسل...كالعادة...اليابانيون مثلا..
اخذوا عنا الملوخية...و ابدعوا في صناعتها...اي قدموها في اشكال مختلفه..

البطيخ ايضا...و اصبح هناك بطيخ مربع الشكل و مستطيل الشكل....

هم يبحثون عن كل جديد...و عن ابداعات
في مختلف المجالات...و نحن نعاني من الاحباطات...و امنيات الثراء السريع.

تحياتي و تقديري

kafrawy يقول...

ميقدروش يسرقوا عربيه الفول مننا

يحيا الطعميه مع الفول

القرآن الكريم