حماتي ...هل هي ملاك ..ام قنبلة ذرية ..؟؟؟

من اكثر الهواجس التي تقلق المقبلات علي الزواج هي ....الحماة ...وما هو مصير العلاقه بينهما ...وهل ستكون سعيده مع حماتها ام انها ستحول حياتها الي جحيم لا يطاق ..؟؟؟

عندما يبدأ الحديث عن اي حماة فورا نتذكر ماري منيب كرمز للحموات المفتريات اللي كل شغلتهم في الحياه هي تنغيص عيشة زوجات الابن ،وتحويل الحياه الي سجن الباستيل
لو قلنااحنا في عصر العولمة وسيبنا من الافلام العربي،هاتطلع لنا الست جين فوندا في فيلم monster in law
وكل اللي عملته في جينفير لوبيز علشان تبوظ لها الجوازه ...يعني ما فيش فايده ...صورة الحما هي هياها في كل الدنيا
لما كنت مقبله علي الزواج ،اكثر ما كانت صديقاتي يحكين عنه ويحذرن منه هي حماتي ، خدي بالك لازم تكسبيها في صفك ...خدي بالك اوعي تجري شكلها .....ومنهم شويه كانوا بينصحوا اني ما انصرهاش عليا ابدا واخلي دايما زوجي يكون في صفي ظالمه او مظلومة ...!!!!!
و كمية نصايح اشكال والوان ، وحكايات من الموروث الشعبي لتاريخ الحماة وزوجة الابن ، وأمثال علي شاكلة
" ان كان القمح يساوي التبن ....يبقي الحما تحب مرات الابن !!!" وغيرها من الاشياء اللي تخلي اي حد يحس انه داخل معركه حربيه مش حياة زوجية
اما امي فكانت توصيني بها دائما وتطلب مني ان اعاملها كما امي ، قائله: " مصيرك يا مرات الابن تبقي حما "
، وزي ما هاعاملها مرات ابني ان شاء الله هاتعاملني مستقبلا

وبالنسبة لي فقد اصبحت مشتته بين كل الكلام اللي بيتقال عن الحموات وبين اللي المفروض اني اعمله
دخلت حياتي الزوجيه وانا متوجسه خيفه من حماتي و دايما كنت حطاها في دماغي ، ومتابعه تصرفاتها الكبيره قبل الصغيره ،
صحيح هي مش زي ماري منيب ، بس برضو مش ملاك
تخنقني تدخلاتها في كل صغيره وكبيره ، وفضولها الزائد عن الحد ، واللي بيساعد علي كده اننا نعيش في نفس المنزل بس كل واحد في شقة منفصلة ،هي لا تكف عن التدخل في حياتنا بشكل فظيع ، النمله ماتعديش من تحت عينيها، فبحكم سكنها في الدور الارضي تعتبر كالحاكم بامر البيت ، ولازم كل حاجه تمر عليها الاول وتحط موافقتها عليها
وياسلام لو حاجه ماعرفتهاش ، تبقي ليله يا عمده ...لازم وحتما ولابد تتقص لحد ما تجيب قرارها ، والموضوع ده زاد بعد خروجها علي المعاش وسفر ابنها الآخر وبالتالي البيت فضي علينا احنا الاتنين ، خاصة ان زوجي معظم اليوم في العمل ،
وهي لا يعجبها العجب ودائما تنقد جميع التصرفات ، كما آاخذ عليها البخل الشديد ، ولكن الغريب في الامر ان هذا البخل الا يظهر الا علينا احنا وعلي نفسها ، اما الآخرين فلا فهي والحق يقال تؤدي الزكاه في وقتها وتتصدق بالكتير جدا من المال ، اما نفسها ونحن فلا
لو اشتريت حاجه يبقي تبذير ومالوش لازمه ، لو عزمنا اصحابنا يبقي ده سفه ولازم يتحجر علينا ، لو اتغدينا بره يبقي انا ست خايبه ومش مدبره وجوزي ها يشهر افلاسه علي ايدي ....وغيرها من الحاجات اللي تعلي الضغط وتجيب انفجار في المراره

بالرغم من كده احيانا اجدها تصعب علي جدا خاصة عندما اجد الوحده تنهش فيها ، فبحكم عملي اقضي وقت طويل خارج البيت كذلك زوجي ، كما انها مصابة بالربو وعندما تأتيها الازمه تكون في اكثر حالات ضعفها
اشعر اني مصابة بازدواج في الشخصية فاحيانا اكرهها بشده واحيانا احبها من كل قلبي ، ومع كل ده لا اظهر لها اي من هذه المشاعر واعاملها عادي جدا كما اعامل امي واكثر

بعد زواج اختي ...واللي حماتها عملاه فيها ، قالت لي احمدي ربنا انت حماتك ملاااااااااااااك

ولكني بعد 10 سنوات من الزواج ما زلت حائره هل حماتي فعلا ملاك؟ ...ام انها قنبلة ذريه؟؟
هل سأحتاج الي 10 سنوات اخري لاعرف ذلك ؟؟ ام اني ساعيش واموت دون التوصل لأجابة هذا السؤال ..؟؟