احمد ومني ( الجزء الاول )

احمد بيجري علي مني ، ينادي عليها بصوت عالي ..منااااااااااااا
ومني تجري عليه وتنادي احماااااااااااااااااااااااااد
يلتقيان في منتصف الطريق ، تتعانق ايديهما واعينهما ،يهمس احمد في شوق ....ها انا ذا يا حبيبتي عدت اليك بعد طول غياب ، اعدك الا اتركك ثانيا ابدا فكفانا ما ضاع من العمر
تهمس مني بصوت أقرب الي زقزقة العصافير ..احبك يا احمد ....احمدددد ....احمددددددددد....احماااااااااااااااااااااد
مني ..مني ...اصحي يا بنتي ها تتأخري علي محاضراتك ، يادي الافلام اللي بوظتلك دماغك ، كفايا نوم بقي الساعه بقت 8ونص
كان ذلك هو صوت والدة مني وهي توقظها و تخرجها من حلمها الجميل الذي تحلم به يوميا منذ ان التحقت بكلية الصيدله قبل اربعة اعوام ، كم تتمني ان تقابل ذلك الاحمد الذي يغير لها حياتنا ويلونها بلون الزهور وتعيش معه احلي ايام عمرها في سعاده

تستيقظ وهي تتمني ان يطول الحلم اكثر واكثر وان يستمر طوال العمر ، ترتدي ملابسها سريعا وتحمل كشكول المحاضرات والبالطو الابيض، تشرب كوب النسكافيه اليومي ثم تخرج مسرعه كي لا تتاخر علي السكشن ، يوقفها صوت امها
ايه يابنتي مش هاتفطري ها تنزلي كده علي لحم بطنك
معلش ياماما اصلي متأخره مش هالحق
طيب حتي ولو ساندويتش صغير
معلش يا ست الحبايب مافيش وقت هاتأخر علي سكشن الفارما

داخل الميكروباص و في ذلك المكان الضيق الذي يسعها بالكاد، اخذت تتفكر في احوالها

حاسه بملل فظيع ، مع ان حواليا ناس كتير اوي .....اصحابي واخواتي واهلي ، بس عندي شعور غريب بالوحده ، لسه مش لاقيه حد يفهمني ويحسني، مش لاقيه اللي اقدر افتحله قلبي واشكيله همومي ، احساس رهيب بالفراغ العاطفي والوحده القاتله بيطاردوني ، حاسه ان قلبي مكسور.....فينك يا سي احمد .......امتي بقي ؟؟؟....امتي هاتظهر فحياتي وتغيرها لي 180 درجه....آاااااااه ، عارفه ان اللي مقدره ربنا ها يكون ، واكيد التأخير خير........ماحدش يعرف الا ربنا ...
افاقت علي صوت وقوف الميكروباص ونزول بقية الركاب، نزلت مسرعه وهي تنظر الي ساعتها ، قفزت الدرج لتصل اخيرا الي باب المعمل وتجده مغلقا

السلام عليكم ، مين المعيد الغريب ده ...همست لنفسها ، آسفه علي التأخير

آسف يا دكتوره ما فيش دخول بعد ما الباب يتقفل ، لو سمحتي اتفضلي واقفلي الباب وراكي

في هذه اللحظه شعرت مني ان الارض تدور من تحتها وان وجهها اصبح بلون الدم ، خرجت واغلقت الباب في هدوء
شعرت بغضب شديد جدا ورجفة قوية ، ولكن عادت لتتذكر ...انها اول مره تري هذا المعيد ، من هو ، ومن اين جاء .........كم هو وسيم
ده الدكتور احمد معيد جديد اتنقل عندنا من جامعه عين شمس ، اول يوم ليه انهارده بس ايه يا مني شرحه هايل ...كانت هذه سالي صديقة مني الانتيم
د/احمد .......و عين شمس ...آاه ، اتاريه شايف نفسه وبيتنك علينا
بس ايه يا منمن مش عارفه اوصفلك البنات كانوا هايتهبلوا عليه

سرحت مني ، احمد ... ازاي واحد زي ده يبقي اسمه احمد ، دا غلس ودمه واقف ، لا مش ممكن ، لو احمد بالشكل ده يبقي بلاه احسن ،

يلا يامني ...مني فوقي يابنتي انت سرحتي فأيه ، يلا عشان نلحق المحاضره

مر اليوم ومني مغيبه تماما مازالت تشعر بالضيق بسبب الاحراج الذي سببه لها الدكتور احمد ، وما حدث لها امام جميع الطلبه ، وعباره واحده تتردد في عقلها ...لو سمحتي اتفضلي واقفلي الباب وراكي

الاسبوع التالي وفي موعد سكشن الفارما ، وجدت مني نفسها تضبط المنبه علي السابعه والنصف صباحا ،لتستيقظ مبكره ، فهي لا تريد ان يتكرر ماحدث
ماشاء الله ماشاء الله ، مني بنتي حبيبتي صاحيه بدري ولوحدها ، لأ دا انا لازم ابخرك
معلش بقي يا ماما اصل معيد الفارما غلس اوي ومش بيدخل حد وراه وانا مش عاوزه مشاكل ، سلام بقي يا حبيبتي علشان متاخرش
في هذا اليوم وصلت مني مبكره جدا حتي قبل العامل المسئول
اما نشوف اخرتها ايه معاك يا سي احمد
واخيرا دخل الدكتور احمد
صباح الخير يا جماعه ، النهارده هانعمل تجربه مهمه اوي .........

واخذ يوضح للجميع ماهو مطلوب منهم وما يجب ان يفعلوه ، ظل طوال الوقت يمر علي جميع الطلبه يساعد من يحتاج او يشرح بعض الجزئيات ، ومني تتابع كل ما يفعله
شعور غريب سيطر عليها منذ ان انهت يومها ، هناك مشاعر غير محددة الملامح ، شئ غريب لا تجد له مسمي ، والاشد غرابه ان هذا الشخص الذي حكمت عليه من مجرد موقف واحد ، وكانت تعتقد انه متكبر ومتعالي قد وجدته انسان علي درجه عاليه من الذوق ، شعرت انها قد ظلمته بحكمها المسبق عليه ....واخذ ضميرها يؤنبها

اصبحت مني تهتم جدا بكل ما يتعلق بالدكتور احمد ، وعندما تسمع اسمه يتردد تقف لتصغي وتسمع باهتمام جميع ما يقال ، وكان ما ساعدها علي ذلك انه جديد علي الكليه كما انه يتمتع بقدر عالي من الوسامه مما جعل جميع البنات يتحدثن عنه ويبحثن خلفه ، عل واحده منهن تفوز به زوجا لها
واصبح موعد سكشن الفارما مقدسا عندها ، وكانت تجلس كالمسحوره تتابعه بعيناها طوال الوقت

يلا يا مني هاتي الادوات بسرعه وهاتي البالطو علشان نلحق محاضرة الدكتور سليمان ، انت عارفه انه بياخد الغياب ، يلا مش عاوزين مشاكل
حاضر حاضر يا سالي جايه اهو ، ايه الحاجات دي كلها ، كان لازم يعني نصور الورق دا كله انهارده
وبسبب التسرع والعجله الشديده سقطت منها مذكرة العملي ولم تنتبه الا داخل محاضرة د/ سليمان

سالي تصدقي مش لاقيه مذكرة عملي الفارما ..تبقي خيبه لو ضاعت دي عليها نص درجة العملي
ماتقلقيش يامني بعد المحاضره نبقي نروح نشوفها في المعمل وان شاء الله نلاقيها