رجعت ايام الصيفية

النهارده بداية التوقيت الصيفي

كل سنة وانتوا طيبين

في ناس كتير جدا مش بيحبوه وبيقولوا انه بيقلل ساعات نومهم و الدكاتره النفسيين مش مع التغيرات المستمره في التوقيت وبيقولوا انها بتخلي الانسان مش قادر انه يظبّط ساعته البيولوجيه وده ممكن يخلي بعض الناس في حالة اضطراب مزاجيه وعصبيه ،بيغضبوا بسرعه وما بقدروش يسيطروا علي انفعالاتهم

بالرغم من كل ده انا باعشق التوقيت الصيفي ، ومع ان لسه بدري اوي علي بداية الصيف رسمي بس بدايته عندي مرتبطه بتغيير الساعه
النهار بيطول والليل صحيح المفروض انه بيقصر بس السهر بيزيد علشان كده بيجيلي احساس ان حتي الليل اطول من الشتا

تغيير الساعه مرتيط عندي باغاني ام كلثوم ، كنت دايما اذاكر في اوده بتطل علي الشارع وقدامنا كان في قهوة عم "ابو دلال" - هو اسمه كده - اللي كان مع بدايات شهر خمسه وتغير الساعه يبدأ يشغل ام كلثوم كل يوم بعد العصر من حوالي الساعه 6 من اذاعة ام كلثوم ( ده كان اسمها الدارج عندنا)
كنت اقعد اذاكر خاصة في الثانويه علي صوت الست ، وشمس المغربيه داخله من الشباك ونورها معكوس علي الكتب ، بصراحه كان جو اكثر من رائع ويفتح النفس للمذاكره

كمان تغيير الساعه مرتبط عندي بالذهاب كل يوم قبل المغرب لبيت جدتي وقضاء وقت جميل معاها و مع خالاتي
و القعاد في البلكونه وقزقزة لب البطيخ
و مكتبة الثقافة اللي بتطل علي النيل و كنت باروحها كل يوم بعد العصر



وطبعا راس البر اللي كانت من الحاجات المقدسه عندنا كل سنه

ذكريات جميله اوي لو قعدت اعد فيها مش هاقدر اخلصها
التوقيت الصيفي بيمثلي الانطلاق والحريه اللي بيبقوا في الصيف

انا فعلا بحب التوقيت الصيفي وياريت تكون السنة كلها صيف وتوقيت صيفي