TvQuran

٢٠٠٧-٠٤-٢٧

رجعت ايام الصيفية


النهارده بداية التوقيت الصيفي

كل سنة وانتوا طيبين

في ناس كتير جدا مش بيحبوه وبيقولوا انه بيقلل ساعات نومهم و الدكاتره النفسيين مش مع التغيرات المستمره في التوقيت وبيقولوا انها بتخلي الانسان مش قادر انه يظبّط ساعته البيولوجيه وده ممكن يخلي بعض الناس في حالة اضطراب مزاجيه وعصبيه ،بيغضبوا بسرعه وما بقدروش يسيطروا علي انفعالاتهم

بالرغم من كل ده انا باعشق التوقيت الصيفي ، ومع ان لسه بدري اوي علي بداية الصيف رسمي بس بدايته عندي مرتبطه بتغيير الساعه
النهار بيطول والليل صحيح المفروض انه بيقصر بس السهر بيزيد علشان كده بيجيلي احساس ان حتي الليل اطول من الشتا

تغيير الساعه مرتيط عندي باغاني ام كلثوم ، كنت دايما اذاكر في اوده بتطل علي الشارع وقدامنا كان في قهوة عم "ابو دلال" - هو اسمه كده - اللي كان مع بدايات شهر خمسه وتغير الساعه يبدأ يشغل ام كلثوم كل يوم بعد العصر من حوالي الساعه 6 من اذاعة ام كلثوم ( ده كان اسمها الدارج عندنا)
كنت اقعد اذاكر خاصة في الثانويه علي صوت الست ، وشمس المغربيه داخله من الشباك ونورها معكوس علي الكتب ، بصراحه كان جو اكثر من رائع ويفتح النفس للمذاكره

كمان تغيير الساعه مرتبط عندي بالذهاب كل يوم قبل المغرب لبيت جدتي وقضاء وقت جميل معاها و مع خالاتي
و القعاد في البلكونه وقزقزة لب البطيخ
و مكتبة الثقافة اللي بتطل علي النيل و كنت باروحها كل يوم بعد العصر



وطبعا راس البر اللي كانت من الحاجات المقدسه عندنا كل سنه

ذكريات جميله اوي لو قعدت اعد فيها مش هاقدر اخلصها
التوقيت الصيفي بيمثلي الانطلاق والحريه اللي بيبقوا في الصيف

انا فعلا بحب التوقيت الصيفي وياريت تكون السنة كلها صيف وتوقيت صيفي




30 comments:

SomeOne يقول...

ياسلام بقى ساعة عصاري كده

وتمشية في الهواء الطلق

بحس اني طاير

طاير

طاير

رينـــــــــــا يقول...

يااااااااااا
فكرتينى فعلا با ايام زمان
وام كلثوم كل يوم الساعه 5 لحد الساعه 10
مع فنجان القهوة ..والجيران تتجمع
كانت ايام حلوة اوى
كانت الايام ليها طعم تانى
ياريتها ترجع

david santos يقول...

Thanks for you work and have a good weekend

SomeOne يقول...

انا لسة واخد بالي انك شيلتي البانر

خالص شكري
وتقديري

خمسة فضفضة يقول...

السلام عليكم ورحمة الله وبركاته

د/ شادي
اهلا وسهلا

ولو بقي علي شط النيل او البلاج مع شوية ترمس ولا ذره مشوي يبقي آخر جمال

نورتني

خمسة فضفضة يقول...

السلام عليكم ورحمة الله وبركاته

رينا

منوراني

ايام زمان كان كل حاجه ليها طعم تاني طعم احلي بكتيررررررررررررررر
من دلوقتي
يمكن علشان كنا لسه صغيرين وبنكتشف الدنيل ولسه ما شلناش الهم

هي اذاعة ام كلثوم دي لسه موجوده ..؟؟؟؟

خمسة فضفضة يقول...

السلام عليكم ورحمة الله وبركاته

david santos

Thank you and have a good weekend

خمسة فضفضة يقول...

السلام علكم ورحمة الله وبركاته

شادي
ايوه شلته امبارح بناء علي راي الناس

ممكن تثقرأ ردي عليك في البوست السابق

shabfa2re يقول...

ده توقيت سخيف
حد يصلى العشاء الساعة 9
وادام شوية هتبقى 9 ونص
توقيت خنيق موت

mohand يقول...

السلام عليكم
تغيير الوقت بيغير حالة الروتين والملل
كنت بغيير حاجات كتير معاه
بس انا مش مقتنع بموضوع الطب النفسي ده
انا شخصيا حالتي النفسيه بتتصلح

تحياتي

خمسة فضفضة يقول...

السلام عليكم ورحمة الله وبركاته


شاب فقري

اهلا وسهلا

طيب مش احسن من ماتدن الساعه 6 وننام من بدري زي الفراخ ..........هههههههههه


نورتني

خمسة فضفضة يقول...

وعليكم السلام ورحمة الله وبركاته

مهند

ياوويلكم يا ويلكم

اهلا بيك في في مدونتك
وانا كمان نفسيتي بتبقي احسن بكتيييييييييييير في الصيف عن الشتا

هما بيقولوا ان الناس دي نسبه قليله جدا يعني تقريبا نادره
بس اكتئاب الشتا ده معروف ومنتشره اكتر من بتاع الصيف



تحياتي لك

Nothing To Lose يقول...

الله الله الله الله
ايه الجمال دا
ام كلثوم..مع نسمه الصيف
فى المغربيه
مع كبايه نسكافيه
وزقزقه العصافير فى الوقت دا

بصى جو تانى خااااااااااالص

انا كنت بحب اوى اذاعه ام كلثوم
كانت تبتدى 5 وتخلص 10

تسمعى اغانى جميله ..وتستمتعى فعلا

على فكرة اه الاذاعه لسه شغاله عادى ..وبنفس النظام :)))))

كراكيب عادل يقول...

وهي ام كلثوم متتسمعش في الشتا يعني تعرفي انا عكسك تماما بحب الشتا وسهر الشتا علشان الليل بيكون طويل وبيكون كلة هدوء ولو فية قعدة جميلة وشلة وتسالي والشتا كل لبسة شيك

الصيف كلة عرق والناس كلها بتكون متضايقة بس برضو التغير حلو
الصيف جميل علشان البحر وكلة بيكون في اجازات وفسح وحرية صح بس برضو بحب الشتا :)

gohayna يقول...

هختلف معاكي وازعق
كمان

انا بحب الشتا اكتر
بيقي الدفا فيه رائع

صحيح انا بكون متلجه فيه وحالتي حاله
والخروج فيه من تحت البطنيه علشان تروحي الشغل في التلج بيكون مرعب بس برضه بحبه

وكلوا كوم وبرد الكويت كوم تاني

والبرق والرعد والسيول

الله

حاجه تحفه
اكيد بتقولي دي مجنونه سمعاكي

بس والله الشتا مفيش احسن منه

تحياتي

طبعا بتقولي في

ma 3lina يقول...

أنا لا مع ولا ضد ضد التوقيت الصيفي ولا الشتوي

بس أنا بكره عملية تغيير الوقت دي .. مش معقول نعمل حاجة زي كده وهي أصلاً بلا معنى والعالم بطلها ..

وحجة توفير الطاقة فبصفتي كهربائي سابق أقول إن الكلام ده مش صح حاليا .. كان زمان صح .. بس دلوقتي لأ ..

فلم يبق من مسألة تغيير الساعة إلا اضطراب الناس ولخبطة المواعيد ..

فياريت يبقى طول السنة توقيت صيفي .. او حتى توقيت شتوي بدل الشحططة اللي احنا فيها دي

خمسة فضفضة يقول...

السلام عليكم ورحمة الله وبركاته

نوثنج تو لوز
وياسلام بقي لما الامتحانات تخلص والعيله تتلم في البلكونه
والشاي اللي فيه قرنفل

ياسلام والله كانت ايام جميله

اذاعة ام كلثوم لسه موجوده ..بس للاسف البال الرايق بتاع زمان هو اللي ما عادش موجود


تحياتي

خمسة فضفضة يقول...

السلام عليكم ورحمة الله وبركاته

عادل

في حد يحب الشتا والسقعه
ولا لدنيا لما تشتي والارض تطّين و كل حاجه تقف
والواحد يبقي مش عاوز يطلع من تحت اللحاف والبطانيه

و بالنسبة للبس بالعكس الصيف لبسه حلوه كده الوان تبهج
ومافيهوش خنقة الشتا اللي الواحد بيبقي لابس فيه الدولاب كله

لا ..لا..حاول تعيد النظر


تحياتي

خمسة فضفضة يقول...

السلام عليكم ورحمة الله وبركاته

د/ جيهان
اهلا اهلا
طب بالله عليك بعد كل اللي انت قولتيه ده
حد يحب الشتا والحبسه في البيت تحت البطانيه
ياشيخه الصيف احسن ميت مره

نورتيني

خمسة فضفضة يقول...

السلام عليكم ورحمة الله وبركاته

باشمهندس ما علينا

يا اهلا يا اهلا

فعلا موضوع تغيير الوقت ده بيدايق ويلخبط الموود بتاع ناس كتير اوي
ياريت يفضلوا علي التوقيت الصيفي طول السنه

علي فكره مش احنا بس اللي بنطبقه دا فيه بلاد كتير غيرنا
الولايات المتحدة وكندا , الاتحاد الأوروبي, روسيا, تركيا
واسرائيل وتونس ولبنان وسوريا والعراق والاردن


تحياتي لك

Unknown يقول...

انا كائن صيفى اصلا
بكره الشتا بشكل رغم انه جو رومانتيك مع المطر فوق الكوبرى بس ده مع الحبيبة بس
مش مع اللى زينا
بس انا بحب الصيف اكتر
خروجاتى
هواياتى
كل احلامى بحققها ف الصيف
الشتا بكون ف البيات بتاعى
بحبك ياصيف

koukawy يقول...

انا معترضه معاكي انا بحب التوقيت الشتوي و بحب الشتا و البرد و المطره و الزعابيب و الثلج
ده طبعا غير ان انا معترضه انتي عارفه علي تغيير الساعه من اصله
نورتيني في العشه

الدفاع يقول...

السلام عليكم يا دكتوره
اما نشوف الناس اللى عاجبها التوقيت الصيفى هاتعمل ايه فى رمضان السنه دى لما المغرب يؤذن الساعه 8:30 اكيد هانفكر نعمل جمله لمقاطعة التوقيت الصيفى انا عن نفسى هأخر ساعتى لوحدى وابقى اصيف بعد رمضان بقى

الطائر الحزين يقول...

يا خسارة الصيف وتوقيتة عجبك يا دكتورة
بداية مدونة الدفاع خذلوك ورمضان بدايتة عودة التوقيت الشتوى
دكتورة هل وقفت يوما وسرتى تحت المطر واحسست بنشوة والشارع فاضى من الناس
هل استنشقت يوما عبيرا اجمل من الهواء بعد المطر
هل هناك اطهر من ماء المطر وانزلنا من السماء ماءا طهورا

خمسة فضفضة يقول...

السلام عليكم ورحمة الله وبركاته

هدي ( دودوش )

ايوه كده هي دي الناس ولا بلاش

نورتيني

خمسة فضفضة يقول...

السلام عليكم ورحمة الله وبركاته

كوكو الكميل

يا ويلكم يا ويلكم

صدقيني حاولي تعيدي نظر في الموضوع ده
دا انت اللي نورتيني

خمسة فضفضة يقول...

وعليكم السلام ورحمة الله وبركاته

مدونة الدفاع

والله هي هياه بالنسبة لساعات الصوم هو احنا بنحسب علي الساعه شتوي ولا صيفي
احنا بنحسب الصوم من الفجر لحد المغرب
وزي ما حضرتك عارف الصلاة مواعيدها مرتبطة علي مواعيد الشمس والشروق والغروب

بمعني هما عدد محدد من الساعات لو في الصيف ها يبقوا زياده ولو في الشتا ها يبقوا اقل
بمعني لو انا في شهر اغسطس وجه عليا رمضان ها صوم بردو من الفجر للمغرب
وحتي في التوقيت الشتوي ها يبقي الفطار الساعه سبعه ونص ها تعملوا ايه ساعتها بقي ....ههههه
مش ها ينفع تقللوا الساعات


تحياتي

خمسة فضفضة يقول...

السلام عليكم ورحمة الله وبركاته

الطائر الحزين

طيب حضرتك عمرك حسيت بنسمة الهوا اللي بتبقي ساعة المغربيه
والشمس وهي بتستخبي ورا موجة البحر ولا تنزل تستحمي في مية النيل

والدفا اللي بيبقي في لمة الصيف

اما الشتا فكل الناس مستخبيه تحت البطاطين ومحدش بيخرج من بيته
والجو برد واليوم بيخلص بسرعه..و .., ...و

وعموما لولا اختلاف الآراء لبارت السلع
لازم برضو يكون في ناس بتحب الشتا علشان ما يزعلش .هههههه
بس بجد حاولوا تبصوا للصيف بعين تانيه ها تلاقوه يستحق الحب



تحياتي

Shiko يقول...

انا برضو بحب الصيف رغم الحر والشمس الحاميه لكنه عندى افضل من الشتا بضبابه ومطره اللى بيدخلنى فى مود كئيب

خمسة فضفضة يقول...

السلام عليكم ورحمة الله وبركاته

شيكو

ايوه كده ، فعلا الصيف بالرغم من الحر والتراب واي حاجه تانيه بتبقيفيه
بحبه و نفسي السنة كلها تبقي صيف

تحياتي

القرآن الكريم