2010-05-02

شئ من الأمل





ان الواحد يكون هو الدكتور دي حاجه كويسه اوي جدا خالص ومافيهاش اي تعب ومابتكلفكش اي حاجه

بس لما الادوار تتبدل والدكتور يبقي هو العيان بتكون مشكله كبيره

خصوصا انه عارف كم البزنسه اللي بيعملها معظم الاطباء علي العيانين الغلابه اللي لا حول ليهم ولا قوة وكل غلطتهم ان ربنا حطهم في اختبار المرض
وبيبقي عارف كويس اوي ان المريض في مصر ماهو الا مجرد زبون وسبوبه

كل واحد بيتعامل معاه( دكتور، صيدلي ، ممرضه ، معمل تحاليل ......الخ) بيحاول يزود مكسبه ومش مهم صحة المريض ولا حتي حياته، المهم في الآخر هو هايطلع كسبان اد ايه ؟؟

الكلام ده طبعا مش جديد واكيد اي واحد عايش في البلد دي حاسس وشايف اللي بيحصل ، بس انك تكون جوا الكادر اكيد غير انك تكون بتتفرج عليه من برا

لما الطبيب بيبقي هو العيان بيبقي خايف ومش واثق في اي حد بيحاول دايما انه ياخد راي اكتر من دكتور و يروح لاكتر من مستشفي عشان يتأكد ان التشخيص واحد وان اسلوب العلاج صح ومافيهوش بزنسه

بيبقي متردد انه ياخد قراره بالنسبه لاي جراحه او اجهزه مساعده يطلبها الاطباء زمايله ، خصوصا لو مرضه خارج تخصصه

وتلاقيه ليل نهار بيتصفح كل المواقع الطبيه اللي بتتكلم عن حالته ، وعن طرق العلاج المختلفه اللي تناسبها وكل حاجه عنها بالتفصيل الممل من اول اسباب المرض لحد آخر حاجه ممكن يتطورمرضه ليها لا قدر الله

اما بيكتشف ان جزء كبير من سوء حالته كان سببها اهمال الاطباء وعدم اخبارهم ليه بحقيقة مرضه من الاول وانه ساهم معاهم بلامبالاته وعدم متابعته المستمره بيتاكد ان اي نعمه مش بنعرف قيمتها الا بعد ما نلاقيها بتروح مننا

واما يعرف ان الحاله فعلا خطيره لو تم اهمالها او علاجها بطريقة خاطئه ، بيبقي خايف وقلقان ، وبيدعي ربنا ليل ونهار ، يارب اهديني للصح
يارب ان كانت هذه عقوبه فإني اسألك التخفيف والرحمة وان كان بلاء فإني اسألك الصبر علي البلاء وحسن الاجر والجزاء
يارب إكفني شر أخطاء الأطباء وجشع بعضهم ، اما آلامي الجسديه والنفسيه انا كفيل بها





11 comments:

رجل تحت الصفر يقول...

آمين

بجد دي حالة منيلة بنيلة

مع اني ما كنتش مريض مرة و طلع لي اهمال لطبيب - لأني بعتمد على الصيادلة - .

و صعب اني أتخيل الصورة فعلاً لأني خارج الكادر

safa7_karmooz يقول...

انا بقى بكسل اروخ لدكاترة من كتر ما كل واحد بيعك

فبعك مع نفسى

^_^

مع اصرارى يقول...

كله على الله

محمد عبد الغفار يقول...

الحمد لله انى مطلعتش دكتور

MR.PRESIDENT يقول...

مش عارف والله ,, بس ممكن يكون بيروح لواحد زميله عشان ما يدفعش النديره الرك علي الشعب ، ان كنت في المشتشفي مع عمي قمة الطناش والهرجلة ، الصراصير كنت شايفها بتترسم علي الأرض ولا اكنها بطلع لسانها ليا ,

ربنا يستر ويشفي مرضي المسلمين وغير المسلمين ويهدي المسلمين وغير المسلمين للطريق الصحيح ,,

سبهللة يقول...

وشهد شاهد من اهلها

نفس اللى بتقوليه دة هو اللى بيحصل ماعيا بس فى تخصصى
قبل ما اشترى اى حاجة خشب او ليها علاقة بالخشب
بفكر ميت مرة وابحث ولازم أتأكد ان مافيش غش فى اى حاجة
لانى متأكدة ان الناس اللى ما بتفهمش فى الخشب بتاخد لازم تتغش فى البضاعة
للاسف هو دة حال بلدنا
الغش والفساد استشرى فى كل المجالات

AHMED SAMIR يقول...

انتي هتقولي لي على البزنســــــــــة
على يدي
و بعدين دول اساتذة
تلاقي الواحد منهم متحمس لصنف معين و كأنه هو اكسير الحياة
و بمجرد ما الشركة تفرقعه في المؤتمر الجاي
يبقى قوللي على الدوا دة السلام
بيبقى سم قاتل
و لا حول و لا قوة الا بالله

مجداوية يقول...

السلام عليكم

ألف سلامة عليكِ , أسأل الله العظيم رب العرش العظيم أن يشفيكِ ,ففي كل الأحوال خير فإن الابتلاء نعمة إذا صبرنا ونعمة إذا شكرنا وأنت تعلمين أن الشكة البسيطة تحط من خطايانا أو تزيد من حسناتنا , المعروف أن أصعب المرضى هم الأطباء ليس لشكهم فقط ولكن لمعرفتهم فالجهل أحيانا بيكون نعمة

وكما أن باب النجار مخلع فالطبيب قد يكون أكثر إهمالا لصحته
إن شاء الله تكون بسيطة وتبقي زي الفل .. زي الفل بجد مش بتاعت الدكاترة
:)

ستيتة حسب الله الحمش يقول...

السلام عليكم
ازيك يا شكيكة
كلنا هذا الرجل وهذه المرأة
وربنا يشفي كل مريض

يعني بالله عليكي لما تطلع هيئة الدواء وتسحب كام دوا من السوق وتقول بعضهم المادة الفعالة فيه اكثر من اللازم
وبعضهم المادة الفعالة فيه قليلة لدرجة غير فعالة
والله اعلم باللي مخفي
دول العالميين
ازاي انا لا أخضع الأطباء المصريين لنظرية المؤامرة المتحكمة في عقلي

ربنا يعافينا كلنا ولا يحوجنا
لطبيب شاطر
او طبيب من بتوع ينسى الفوطة جوا المريض :)

hamy يقول...

والله يا فضفضه فعلا الواحد لما بيتعب الحكايه بتكون صعبه جدا عليه فربنا يرحمنا ويشفينا جميعا ان شاالله اللهم امين

alo2ah يقول...

:( واضح انه داء في كل بلد للأسف !

القرآن الكريم