2010-05-01

access denied


وقف راضي امام الجزار ينظر بلهفه للحم ويمني نفسه باكله دسمه طالما اشتاق اليها ولم يمنعه عنها سوي الارتفاع الجنوني في اسعار اللحوم

استجمع شجاعته وطلب من الجزار:

اقطع كيلو فليتو يا معلم
الجزار بلهجه حاده فمظهره لا يوحي ابدا بامتلاكه ولو ثمن ربع كيلو :

الكيلو ب 75 جنيه يا استاذ

ايوه ايوه عارف اقطع بس وادي الفلوس وابقي حطلي كام ماسوره المدام تعمل عليهم شوربه

قائلا في نفسه وايه يعني خلاص من انهارده هناكل لحمه وفراخ وفاكهه زي ما احنا عاوزين
و اخذ يتحسس حقيبته وكأنما يخفي فيها خاتم سليمان او الفانوس السحري
ثم هرول مسرعا الي منزله

كادت زوجته ان يغشي عليها عندما راتها اعتقدت في بادئ الامر انها بلاستيك او كاوتش ولكنه اقسم باغلظ الايمان انها حقيقيه وطلب منها ان تعد وجبه دسمه وتتركه ينهي بعض الاعمال علي الكمبيوتر

تحسس الحقيبه مره اخري وابتسم ثم دلف الي الحجره واغلق الباب خلفه باحكام، اخرج سي دي من داخل حقيبته والقاها بلا مبالاه علي اقرب كرسي، جلس الي الكمبيوتر وضغط زر التشغيل

ثم شرد في كلام صديقه عن هذا برنامج وعن انه احدث واقوي برنامج اعدته نخبه من اشهراساتذة الاقتصاد في العالم و انه خاص بتنظيم اعقد الميزانيات سواء للدول او للافراد وان النسخه الاصليه منه قد تكلفه عدة الاف من الجنيهات ومع ذلك استطاع الحصول علي نسخه مكركه لم تكلفه سوي عشرون جنيها

يا راضي دا امريكا بجلالة قدرها بتستخدمه في تظبيط ميزانيتها ، يبقي مش هايعرف يظبطلك ميزانيتك انك يا تافه؟؟!!

قام بتحميل البرنامج وتنصيبه ثم جرت اصابعه فوق لوحة المفاتيح لتظهر المعلومات علي الشاشه :

الاسم : راضي عبد ربه
السن : 42 سنه
الحاله الإجتماعية: متزوج واعول طفلين
الراتب: 400 جنيه
مدة الخدمة : 15 سنه

ضغط زر الادخال فاختفت النافذه وظهرت اخري تطلب المصروفات المطلوبه شهريا :

ايجار السكن : 250 جنيه
مواصلات: 50 جنيه
مصروف البيت : 150 جنيه
اقساط وجمعيات : 150 جنيه
دروس خصوصيه ومصاريف مدارس : 200 جنيه
ملابس واحذيه : 200 جنيه كل ستة اشهر
طوارئ: 50 جنيه

ما ان ضغط زر الادخال حتي صدر عن الكمبيوتر صوت جرس الويندز الشهير محذرا من وجود خطأ ما
مع صوت ميكانيكي ينطق بالإنجليزية

an error occurred
access denied
try again

حاول مره اخري ولكنه تلقي نفس الاجابه

طيب نحاول نعدل شويه في المصاريف ماهو برضو كل حاجه بالعقل

طيب بلاش الطوارئ والهدوم
انتر


تلقي نفس النتيجه ، حدث خطأ ما الطلب مرفوض حاول مره اخري
access denied

طيب بلاش الدروس واخلي العيال ياخدوا مجموعات تقويه فالمدرسه ولونها زي قلتها يبقي البند هاتيخفض ل 50 جنيه
انتر

نفس النتيجه البرنامج يرفض ادخال المعلومات ويطلب التعديل

access denied

طب بلاش المواصلات ونروح الشغل مشي
انتر

access denied

طب نخفض مصروف البيت ل 100 جنيه وبلاش لحمه وكفاية فول وطعميه
انتر

access denied


بحث عن بعض الخيارات الاخري داخل البرنامج ليجد خيار

Help

ظهرت نافذة المساعده لتحمل بعض الحلول :

لديك بعض الحلول المتاحه لانشاء ميزانيه مظبوطه ماتخرش الميه :

الإقتراض

عمل اضافي : سباك / نقاش/ صبي ميكانيكي/ متسول / نشال / لاعب كوره / ممثل /رقاصه

بيع عفش البيت

التخلي عن الشقه والنوم في الشارع

بيع واحد من الأولاد

الإنتحار بإحدي الوسائل التاليه : شنقا/ غرقا/ حرقا


ضرب كفا علي كف باستغراب من قلة ادب البرنامج وارد امريكا

دا ايه البرنامج ابن التتتتتتتتتتتتتتتيت ده انا اشتغل رقاصه علي اخر الزمن رقااااااصه

اعطي امرا للبحث مره اخري في الحلول المتاحه
مرت الثواني ببطء قبل ان يظهر علي الشاشه جمله تتكرر بانتظام

لا فائده ...لا فائدة ...لا فائدة ..... لا فائدة


طلب منه ان يحاول مره اخري فظهرت جمله اخري

مافيش امل

ثم صدرت بعض الاصوات الغريبه متبوعه برائحة شياط ودخان كثيف من كيسة الكمبيوتر

قام مسرعا لينتزع كابل الكهرباء متمتما في نفسه


يا خسارة العشرين جنيه ، لا و يقولولي دا هو اللي ظبط ميزانية امريكا



ياتري الجزار هايرضي يرجع اللحمه وهي مطبوخه ؟؟؟



12 comments:

sakayar يقول...

:)))
أما إنه راجل غريب صحيح
ميشتغل رقاصة ايه هيحصل يعني ؟
البرنامج حلهاله بس هو اللي كسلان بقى
أو يبيع واحد من ولاده صحيح
دول حتى لو نزل أي سوبر ماركت هيلاقي الناس كلها بتبيع ولادها
:)))

ستيتة حسب الله الحمش يقول...

المواطن ده بيستعبط
عاوز البرنامج
اللي ظبط ميزانية امريكا بجلالة قدرها
يضع الرقاصة في مصاف اي حرفة اخرى؟
ده يبقى برنامج اجنبي فعلا :)

Bella يقول...

هههههههههه

حلوة

عبيط واهبل

بدل مايتعب نفسه ويشتري نسخة مكركة من برنامج مش متعود على تظبيط ميزانيات الموظفين المصريين في الارض كان راح اشتغل لاعب كرة والملايين ح تنزل على راسه ويبقى بطل وصوره ح تملا الميادين تذكر الناس بان فلان الفلاني ممثل مصر في اي حاجة وخلاص

وكان ح يبقى اشطر من البرنامج لو خلا المدام لمؤاخذة تحترف الرقص

بس نقول ايه

موظف خايب

ههههههههههههههه

خمسة فضفضة يقول...

السلام عليكم

ساكايار :

تعمل ايه فالكسل مش عاوز يتلحل ويقلب رزقه حاجه تعل :))

سوتيته :

هانعترض ولا ايه دا حتي الرقص فن جميل ومعبر والله جميل يحب الجمال
حد عنده اعتراض :)

بيلا:
ماهو ده اللي بيرجعنا لورا لو كل واحد شغل دماغه ماكناش ننفع الاجانب ابدا وكان بقي عندنا اكتفاء ذاتي وبنصدر ههههه

منورني

صيدلانيه طالعه نازله يقول...

هههههههههههههههه

عبيط و اهبل

عبيييط و اهبل

بيستهبل بيييييييييستهبل

يقول انتر نقول انتر

متين مره

مفيييييييش فايده

ههههههههههههههههههههه

خمسة فضفضة يقول...

صيدلانيه :

هههههههههه

لا حلوه

مافيش فايده

alo2ah يقول...

:) كان الله في عونه فعلا ! .. >< التدوين عن الوجع موجع !
:) متابعة ما تكتبين !

Bothayna يقول...

أصلا راضي مش هيبقى راضي بعد كدة لأن الكمبيوتر شاط كمان
تيييييت العيشة واللي عايشينها

كلمات من نور يقول...

كده خسارته بقت كبيرة علشان الكمبيوتر مات على ما أعتقد من الصدمة لما شاف الراتب وحاول يوزعه وفشل ......تحياتي

تم وضع تدوينتك في منتدى زبد البحر للتدوين وياريت تشرفينا هناك:

http://mhg1962.ba7r.org/montada-f13/topic-t981.htm#4110

الفقيرة إلى الله أم البنات يقول...

يا بنتى دى الزوجه المصريه هى اكتر واحده تعرف تعمل وتظبط ميزانيه
امريكا ايه وعبط إيه
علشان كده الكومبيوتر مستحملش
المعادله الصعبه اللى بتحلها المصريات بس

اصل نسى يدخل فى المعادله البركه والرضا يسخلوا الرزق يكفى ويزيد
ايوة كده نورتى التدوين

محمد عبد الغفار يقول...

مفيش فى ليسته العمل الأضافى سواق ليه؟

سبهللة يقول...

ههههههههههه
رائعة التدوينة دى يا فضفض
خيالك الواسع وصلنافى النهاية لقمة الواقعية التى لا مفر منها للأسف
ولا حتى بالبرامج الامريكانى قال امريكا قال

تسلم ايدك يا فضفض

القرآن الكريم