TvQuran

٢٠١٠-٠٥-٢٩

جواز جديد



الحمد لله اخيرا وبعد طول انتظار الاسبوع اللي فات جددت جواز السفر بتاعي واستخرجت الجواز الجديد اللي كل حاجه فيه معموله بالكمبيوتر :))
جواز سفري القديم لسه مانتهاش بس انتظرت لحد ما تم تطبيق المرحله التانيه من جوازات السفر الجديده عندنا ( ف 10اكتوبر اللي فات) كمان عشان ما بقاش مضطره اني اعمل كل الاجراءات من اول وجديد

كان كل المطلوب مجرد : الجواز القديم و2 صورة بخلفية بيضاء و صورة البطاقه الشخصيه مع ملأ استماره بيانات ( للرجاله مطلوب الموقف من التجنيد )



جواز السفر الجديد بيتبع المواصفات القياسية العالمية وبيقولوا انه مستحيل يتزور او يتقلد لانه تم عمل علامات لتأمين الجواز ضد التزوير علي 3 مستويات الاول بيري بالعين المجرده والتاني بالاشعه فوق البنفسجية والمستوي الثالث غاية في الدقه و اجهزة كشف التزوير بس هي اللي تقدر تقراه

والجواز معمول بحيث انه يتقرأ في اي حته فالعالم باجهزة قراءة باركود معينه ، مجرد تمرير الجهاز علي الباركود بتظهر كل البيانات المتعلقه بصاحب الجواز اسمه سنه تاريخ ميلاده وظيفته ...الخ وبالتالي بتوفر الوقت غير زمان اما كانت البيانات بتتكتب بالايد

صفحاته كلها مرقمة وعليها صورة توت عنخ آمون ، واعلي الصفحة مكتوبة جمهورية مصر العربية ورقم الجواز مدقوق بالارقام المثقوبة ( اللي هي زي ال IBM cards )



اهم حاجه ان حجمه اقل كتير اوي عن الجواز القديم وبقي شيك اوي :)

فرحانه اوي بالجواز الجديد و عقبال يارب ما العقليات كمان تتغير وتبقي جديده وليها مواصفات قياسية عالميه :))

6 comments:

shimaa elkholy يقول...

مبروووووووك

مش مهم انه يتقرا فى كل مكان

المهم يحترم فى كل مكان
وفى مصر اولا

المصري نفسه يحترم

تحياتي ليكى

خمسة فضفضة يقول...

الله يبارك فيك
عندك حق فعلا

بس اما المصري اللي جو يحترم يبقي اللي بره يحترم :))

Unknown يقول...

الاخت فضفضة
والله انا فعلا نفسي اشيل الجواز الجديد دة وخلاص اتخنقت من فردت الشبشب القديم دة كنت بكون مكسوف حدا وانا في المطار كل الناس تطلع جواز صغير كدة وشكلة شيك وانا اطلع فردة الشبشب دى والناس الاجانب كانوا يفكروا انة دى جواز بتاع العيلة كلها مش جواز فرد واحد المهم ربنا يكرم ونشوف اليوم اللي نشلي الجواز الجديد زيك انا بحسدك يا بختك ناس لها حظ وناس لها فردة ؟؟

مهندس مصري بيحب مصر يقول...

ألف مبروك
عقبالنا
:)

محمد عبد الغفار يقول...

يارب تكون اول تأشيره فيه تأشيره الحج

أنا - الريس يقول...

علي فكرة انا فرحت بالجديد اول لما شلته بس زعلت علي القديم .. كان مميز كده .. اللي خلاني ازعل من القديم قصه قريتها .. واحد كان مسافر دوله فموظف الجوزات اول لما شاف الجواز المصري مات علي نفسه من الضحك .. وسأل الراجل ايه الكشكول ده .. بس اعتذر بعد كده وقال انا بقالي يومين شغال هنا .. ودا اول مرة اشوف بسبور بالحجم ده .

القرآن الكريم